Mazda3 2009

tarafından **Ne On** 5/3/2009, 10:11

5 qapılı Mazda3 hetçbeki də bazarda peyda olacaq.

Los-Ancelesdə
keçirilmiş avtoşou çərçivəsində 2009-cu ildə istehsal olunacaq yeni Mazda3-ün – dünyada Mazda markası altında ən çox satılan avtomobilin ikinci nəslinin premyerası baş tutdu. Yeni model kuzovun daha cəlbedici və dinamik dizaynı ilə seçilir.

Aşağı havaçəkəni, beşbucaqlı radiator barmaqlığını və ya tərəflərin yeni cizgilərini özündə birləşdirən ön hissənin yenidən işlənməsi, eləcə də arxa tərəfin Mazda6 modelinin motivləri əsasında hazırlanması yeni Mazda3-ə daha müasir və ifadəli xarici görkəm verir.

Grand Touring versiyalarında standart avadanlıqlara biksenon faralı və avtomat korrektorlu yeni adaptiv əsas işıqlandırma sistemi əlavə olunub. Yeni Mazda3-ə həmçinin ikizonalı klimat-kontrol, 10 dinamikli “premium-klass” Bose akustik sistemi, mobil telefonların və daşınan pleyerlərin qoşulması üçün çıxıntılar, iPod və Sirius peyk radiosu üçün yerlər quraşdırıla bilər.

Mazda3 2009-un əlavə avadanlıqlarının siyahısına həmçinin yağış sensorları olan şüşətəmizləyənlər, yan güzgülərin qızdırıcıları, dəri üzlük və avtomobilə açarsız giriş sistemi daxildir.

Şimali Amerika bazarına yeni Mazda3 avtomobili MZR seriyalı dördsilindrli iki benzin mühərriki ilə çıxarılacaq. Birinci mühərrikin həcmi 2,0 litrə, qüvvəsi 148 at gücünə, fırlanma anı isə 132 Nm-ə bərabərdir. Mazda6 modelindən götürülmüş ikinci mühərrikin həcmi 2,5 litr, qüvvəsi isə 167 at gücü təşkil edir. Seçilmiş komplektasiyadan asılı olaraq, avtomobilə 5 və ya 6 pilləli mexaniki, habelə 5 diapazonlu avtomat transmissiya quraşdırıla bilər. Hazırda ölkəmizdə Mazda-nın demək olar ki, bütün modelləri avtomobil həvəskarları tərəfindən istifadə edilir. Əlbəttə bunların içində Mazda6 və Mazda3 daha çox üstünlük təşkil edir. İndi, yeni Mazda3 modelinin xarici görünüşü və texniki imkanlarına baxdıqdan sonra əminliklə söyləmək olar ki, bu model də Azərbaycanda uğur qazanacaq.