Elmin inkişaf strategiyası hazırlanıb

[Mr_SMITH]

Sənəddə elmə ayrılan vəsaitlərin səmərəliliyinin artırılması, modernləşmə, informasiya təminatı məsələləri əksini tapıb

“Azərbaycan elminin inkişaf strategiyası və onun həyata keçirilməsi üçün tədbirlər planı” təsdiq olunub. 2009-2015-ci illəri əhatə edəcək tədbirlər planında elmin idarə olunması, modernləşdirilməsi, informasiya təminatı, kadrların hazırlanması, alimlərin sosial təminat məsələləri əksini tapıb.

Milli Elmlər Akademiyasından bildiriblər ki, strategiya prezident İlham Əliyevin “Azərbaycan elmində islahatların aparılması üzrə dövlət komissiyasının yaradılması haqqında” sərəncamına əsasən hazırlanıb. Sənədin hazırlanmasında UNESCO-nun mütəxəssisləri də cəlb olunub. Bundan sonra MEA öz fəaliyyətini tamamilə bu sənəd əsasında quracaq. Belə ki, bütün bu işlərin vahid strategiya əsasında həyata keçirilməsi üçün hazırda elmin vəziyyəti ilə bağlı məlumat bazası yaradılır. Bu işlərə nəzarət funksiyasını yerinə yetirən ekspert komissiyası da fəaliyyət göstərəcək.

Bundan başqa, hazırda Milli Məclisdə “Elm və dövlət elmi-texniki siyasəti haqqında” qanun layihəsi hazırlanır. MEA-da bildirirlər ki, payız sessiyasında həmin layihə müzakirəyə çıxarılacaq. MEA-nın müvafiq strukturlarla birgə hazırladığı layihədə akademiyanın statusu, alimlərin sosial vəziyyəti, elmin gələcək inkişafı və bu sahəni əhatə edən digər məsələlərin hüquqi yolla tənzimlənməsi öz əksini tapacaq.

Layihədə həmçinin elm sahəsinə vəsaitlərin qrant şəklində ayrılması müddəası yer alıb. Belə ki, qrant vəsaitlərin elmin daha vacib sahələrinə ayrılmasını təmin etmək, habelə alimlərin maddi vəziyyətinin yaxşılaşması üçün yeni mexanizmlər hazırlanacaq. Məqsəd həm dövlətin elmə ayırdığı vəsaitin səmərəli istifadəsinə nail olmaq, elmin daha vacib sahələrini inkişaf etdirməkdir.